_ കവരത്തി(30.11.11): യു.ടി ലെവല്‍ കലോല്‍സവത്തിന് തിരിതെളിഞ്ഞു. 10 ദ്വീപുകളില്‍ നിന്നായി 1500 ഓളം കലാപ്രതിഭകള്‍ അണിനിരന്ന കലാജാഥയോടെ പരിപാടിക്ക് തുടക്കമായി. ദ്വീപിന്റെ തനതായ സംസ്ക്കാരം പ്രതിഫലിച്ച കലാജാഥ ഏവരേയും കോരിത്തരിപ്പിച്ചു. നാടന്‍ പാട്ടിന്റെ ഈണത്തിനൊത്ത് താളംപിടിച്ചും ചുവടുവെച്ചും ദ്വീപിലെ കൊച്ചു കലാകാരന്മാര്‍ അവതരിപ്പിച്ച കലാ ജാഥ കാണാന്‍ നാട്ടുകാര്‍ തിങ്ങിക്കൂടിയിരുന്നു. സ്റേഡിയം ഗ്രൌണ്ടില്‍ നിന്നും വൈകുന്നേരം 5.30 ന് പുറപ്പെട്ട ജാഥ 7 മണിയോടെ പഞ്ചായത്ത് സ്റേജ് പരിസരത്തെത്തി.പ്രസ്സ് ജംക്ഷനില്‍ ബി.എഡ് വിദ്യാര്‍ത്ഥികള്‍ ജാഥയ്ക്ക് ഉജ്ജ്വല സ്വീകരണവും നല്‍കി. അഡ്മിനിസ്ട്രേറ്റര്‍ ശ്രീ.അമര്‍നാഥ് ഡോലി കൊട്ടിക്കൊണ്ട് കോലോല്‍സവം ഉത്ഘാടനം ചെയ്തു. തുടര്ന്ന് കവരത്തി വിദ്യാര്‍ത്ഥികളുടെ വൈവിധ്യമാര്‍ന്ന കലാ പരിപാടികള്‍ അരങ്ങേറി. ഇന്ന് നാളെയുമായാണ് മത്സര ഇനങ്ങള്‍ നടക്കുക. 3 സ്റേജുകളിലായി 51 ഇനങ്ങളിലായാണ് മത്സരങ്ങള്‍.
_ഘോഷയാത്രയില്‍ നിന്നും:
തിരു: സംസ്ഥാനത്തും ലക്ഷദ്വീപിലും ചൊവ്വാഴ്ച രാവിലെവരെ വ്യാപകമഴ തുടരും. തെക്കന്‍ കേരളത്തില്‍ അത്യന്തം കനത്തമഴയ്ക്ക് സാധ്യതയുള്ളതായി കാലാവസ്ഥാ നിരീക്ഷണകേന്ദ്രം അറിയിച്ചു. കേരള-കര്‍ണാടക തീരപ്രദേശത്ത് കടല്‍ക്ഷോഭത്തിന് സാധ്യതയുണ്ട്. തീരദേശത്ത് കനത്തമഴയും മണിക്കൂറില്‍ 45 മുതല്‍ 55 കിലോമീറ്റര്‍ വരെ വേഗത്തില്‍ കാറ്റും വീശാന്‍ സാധ്യതയുള്ളതിനാല്‍ മത്സ്യത്തൊഴിലാളികള്‍ കടലില്‍പോകരുതെന്ന് മുന്നറിയിപ്പുണ്ട്. അറബിക്കടലില്‍ കഴിഞ്ഞ ദിവസം രൂപപ്പെട്ട ന്യൂനമര്‍ദം കുടുതല്‍ കരുത്തുപ്രാപിച്ച് അമിനി ദ്വീപ് വഴി വടക്കോട്ട് നീങ്ങുന്നതാണ് മഴ ശക്തമാകാന്‍ കാരണമായത്. ഇത് ചുഴലിക്കാറ്റായി രൂപപ്പെട്ട് ഒമാന്‍ തീരത്തേക്ക് നീങ്ങാനാണ് സാധ്യത. തുലാവര്‍ഷം സംസ്ഥാനത്ത് ശക്തമാണ്. ഇരുപത്തിനാല് മണിക്കൂറിനുള്ളില്‍ ഏറ്റവും ശക്തമായ മഴ രേഖപ്പെടുത്തിയത് വര്‍ക്കലയിലാണ്-18 സെന്റീമീറ്റര്‍ . കവരത്തിയില്‍ 11ഉം നെയ്യാറ്റിന്‍കരയില്‍ ഒമ്പതും കൊല്ലത്ത് ഏഴും സെന്റീമീറ്റര്‍ മഴ രേഖപ്പെടുത്തി.
അഗത്തി (24/11/2011): വീറും വാശിയോടെയും അരങ്ങേറിയ ഇന്‍റര്‍ JB മത്സരങ്ങള്‍ക്ക്‌ തിരശീല വീണു. ജൂനിയര്‍ ബേസിക്‌ സ്കൂള്‍ സൌത്ത്‌, സെന്‍റര്‍, നോര്‍ത്ത്‌ തുടങ്ങിയ സ്കൂളുകളിലെ മത്സരാര്‍ത്ഥികളാണ്‌ പങ്കെടുത്തത്‌.
സമാപന ചടങ്ങില്‍ സീനിയര്‍ സെക്കന്‍ഡറി സ്കൂള്‍ പ്രിന്‍സിപ്പാള്‍ മുഹമ്മദ്‌, വൈസ്‌ ചെയര്‍ പെര്‍സണ്‍ ഉമ്മുല്‍ ഹാന, സീനിയര്‍ ബേസിക്‌ സ്കൂള്‍ ഹെഡ്മാസ്റ്റര് കെ.എ. മുഹമ്മദ്‌ കോയ, ജൂനിയര്‍ ബേസിക്‌ സ്കൂള്‍ സൌത്ത്‌ ഹെഡ്മാസ്റ്റര് മുത്തുകോയ, സീനിയര്‍ ടി.ജി.ടി.യും NCC ഓഫീസറുമായ ബഷീര്‍ ഉപ്പത്തോട എന്നിവര്‍ സംസാരിച്ചു. പീന്നീട്‌ വിജയികള്‍ക്കുള്ള റോളിങ്ങ്‌ ട്രോഫി വിതരണം ചെയ്തു.ഓരൊ വര്‍ഷവും വിജയികള്‍ക്ക്‌ നല്‍കുന്ന ട്രോഫികള്‍ തിരിച്ച്‌ വാങ്ങിച്ച്‌ വീണ്ടും അത്‌ തന്നെ നല്‍കുന്ന പ്രവണതയാണ്‌ ഇവിടെ കാണുന്നത്‌. വേണ്ടത്ര ഫണ്ട്‌ ഉണ്ടായിട്ടും അത്‌ ഇത്തരം കാര്യങ്ങള്‍ക്ക്‌ ഉപയോഗിക്കാത്തത്‌ പ്രതിഷേധാര്‍ഹമാണെന്ന് പേര്‍ വെളിപ്പെടുത്താന്‍ ആഗ്രഹിക്കാത്ത ഒരു പ്രൈമറി അധ്യാപകന്‍ ഈ വാര്‍ത്താ കേന്ദ്രത്തോട്‌ പറഞ്ഞു. "ഞങ്ങള്‍ക്ക്‌ കിട്ടിയ കപ്പില്‍ 1985 എന്ന്‌ രേഖപ്പെടുത്തിയിട്ടുണ്ട്‌. കൂടാതെ അതിന്‍റെ അടിയില്‍ മച്ചിങ്ങ (വെള്ളക്ക) കുത്തിയാണ്‌ കപ്പ്‌ നിര്‍ത്തിയിരിക്കുന്നത്‌".
കില്‍ത്താന്‍(24.11.11): മംഗാലാപുരത്തില്‍ നിന്ന് രാത്രി വൈകിയെത്തിയ മഹ്മൂദിയാ എന്ന മഞ്ചു അഴിമുഖത്തിനകത്ത് പാറയലിടിച്ചു . ആളപായമില്ല. ഇതിലെ ജോലിക്കാരായ 6 പേരേയും പോര്‍ട്ട്ഡിപ്പാര്‍ട്ടമെന്റ് താമസിപ്പിക്കുന്നു. ചരക്കുകള്‍ പകുതി മാത്രമേ ഇതുവരെയായി പുറത്തെടുക്കാന്‍ സാധിച്ചുള്ളൂ.
അഗത്തി(21/11/2011): നീണ്ട മാസങ്ങളുടെ പരിശീലനം അണിയറയില്‍ നിന്നും അരങ്ങേറ്റത്തേക്ക്‌ സമര്‍പ്പിക്കാന്‍ അക്ഷര ലോകത്തെ കുരുന്നുകള്‍ അണിനിരന്ന്‌ കൊണ്ട്‌ 2011-12 ഇന്‍റര്‍ ജെ.ബി. മത്സരങ്ങള്‍ക്ക്‌ അഗത്തി സ്കൂള്‍ കോപ്ലക്സില്‍ തുടക്കം കൂറിച്ചു. സീനിയര്‍ സെക്കന്‍ഡറി പ്രിന്‍സിപ്പാള്‍(i/c) ശ്രീ. മുഹമ്മദ്‌, ഉദ്ഘാടന കര്‍മ്മം നിര്‍വ്വഹിച്ചു. തുടര്ന്ന് കലാപരിപാടികള്‍ക്ക്‌ തുടക്കം കുറിച്ചു. ആണ്‍കുട്ടികളുടെ ജൂനിയര്‍ വിഭാഗം,
സീനിയര്‍ വിഭാഗം,
പെണ്‍കുട്ടികളുടെ ജൂനിയര്‍ വിഭാഗം,
സീനിയര്‍ വിഭാഗം എന്നീ നാല്‌ വിഭാഗമായി തിരിച്ചാണ്‌ മത്സരങ്ങള്‍ നടക്കുന്നത്‌.
കവരത്തി: വിവിധ ആവശ്യങ്ങള്‍ ഉന്നയിച്ച്‌ LSA അഡ്മിനിസ്ട്രേറ്ററിന്‌ മെമോറാന്‍ഡം നല്‍കും. വിദ്യാഭ്യാസ വകുപ്പ്‌ ഡയറക്റ്റര്‍ മുഖേനയായിരിക്കും മെമോറാന്‍ഡം നല്‍കുക. ഈ മാസം 21 നായിരിക്കും ഉദ്യോഗാര്‍ത്ഥികള്‍ക്കും വിദ്യാര്‍ത്ഥികള്‍ക്കും ഉപകാരപ്പെടുന്ന വിവിധ കാര്യങ്ങള്‍ അഡ്മിനിക്ക്‌ സമര്‍പ്പിക്കുക.
PST നിയമനം ഉടന്‍ നടത്താനും ഇതില്‍ ആവശ്യപ്പെടുന്നു.
ഉന്നയിക്കുന്ന വിവിധ ആവശ്യങ്ങള്‍:
1. CTET നടത്തി മാസങ്ങള്‍ കഴിഞ്ഞിട്ടും പ്രൈമറി സ്കൂള്‍ അധ്യാപക നിയമനം നടത്തിയില്ല. നിയമനങ്ങള്‍ ഉടന്‍ നടത്തുക.
2. കലോല്‍ത്സവത്തിനു ഗ്രേസ്‌ മാര്‍ക്ക്‌ അനുവദിക്കുക.
3. M.Phil/Ph.D കോഴ്സുകള്‍ക്ക്‌ ഉടന്‍ സ്റ്റൈപ്പന്‍ട്‌ അനുവദിക്കുക.
4. എഴുത്ത്‌ പരീക്ഷക്ക്‌ ക്ഷണിച്ചിട്ട്‌ ഒരു വര്‍ഷമാവാനായിട്ടും നടത്താത്ത അറബിക്‌ അധ്യാപകരുടെ പരീക്ഷ നടത്തുക.
5. കവരത്തിയിലെ B.Ed,ITI വിദ്യാര്‍ത്ഥികള്‍ക്ക്‌ ഹോസ്റ്റല്‍ സൌകര്യം അനുവദിക്കുക.
6. വിവിധ സ്കൂളുകളിലേക്കുള്ള ഫിഷറീസ്‌ അധ്യാപകരുടെ തസ്തികകള്‍ നികത്തുക.
15 ദിവസത്തിനകം പരിഹാരം കണ്ടില്ലെങ്കില്‍ ശക്തമായ സമരം വിദ്യാഭ്യാസ വകുപ്പ്‌ നേരിടേണ്ടിവരുമെന്ന്‌ LSA മുന്നറിയിപ്പ്‌ നല്‍കി.
ആന്ത്രോത്ത്: രാജ്യത്തിന്റെ ഭക്ഷ്യ സുരക്ഷ ഉറപ്പാക്കാനുള്ള പ്രതിഭദ്ധയുടെ ഭാഗമായി ഫുഡ് കോര്‍പറേഷന്‍ ഓഫ് ഇന്ത്യയുടെ 2500 മെട്രിക് ടണ്‍ സംഭരണ ശേഷിയുള്ള ഗോഡൌണ്‍ കേന്ദ്ര മന്ത്രി ശ്രീ.കെ.വി.തോമസ് ഉത്ഘാടനം ചെയ്തു. അഡ്വ.ഹംദുള്ളാ സഈദ്.എം.പി, ഡോ.ബി.സി.ഗുപ്ത.ഐ.എ.എസ്, ശ്രീ.അമര്‍ നാഥ്.ഐ.എ.എസ് തുടങ്ങിയ പ്രമുഖ നേതാക്കള്‍ പരിപാടിയില്‍ പങ്കെടുത്തു.
RSS Feed